Eis Gemeng Suessem ass Signataire vun der lëtzebuerger "Charte de la Diversité" an huet sech zanter ville Joeren och dem Konzept "Design for All" verpflicht. Gläichfalls huet eis Gemeng d'Ambitioun fir am Kader vun hirem "Mobilitéitsplang 2030" zu enger vëlosfrëndlecher Gemeng ze ginn.
Déi gréng hunn an dësem Sënn haut, den 30. Abrëll eng  Motioun fir eng "barrierefräi a vëlosfrëndlech Gemeng" am Gemengerot agereecht duerch déi de Schäfferot invitéiert sollt ginn, d'Méiglechkeeten ze iwwerpréiwe fir esouwuel d'Foussgängerbréck iwwert de Gleisen tëschent der Rue de France an dem Bieleser Kierfecht, wéi och d'Ënnerféierung ënnert de Schinnen bei der Gare Belval/Rédange esou ze gestalten, datt se an Zukunft och vu Leit mat kierperlechen Aschränkungen a Leit mat Kannerkutsch iwwerhaapt emol, an och vu Vëlosfuerer besser genotzt kéinte ginn.
Leider ass eis Motioun mat de Stëmme vun der LSAP/CSV Majoritéit verworf ginn.
De Schäfferot huet zwar wuel all eis Begrënnunge richteg fonnt an eis Initiativ begréisst, mee amplaz proaktiv ze schaffen an ze kukke wat een do kuerzfristeg kéint realiséieren, waart de Schäfferot léiwer op een zukünftegt Gesetz iwwert d'Accessibilité à tous de lieux ouverts au public, des voies publiques, ... (PL7346) bei deem nach net gewosst ass  wéini et kënnt a wat definitiv drasteet, fir dann eréischt ze analyséieren ob a wat een op deenen 2 Plaze maache kéint fir d'Mobilitéit vu Leit mat kierperlechen Aschränkungen, Leit mat Kannerkutsch an och vun de Vëlosfuerer op dësen 2 Plazen ze verbesseren.
Ëmmerhin ass d'Verspriechen vum Schäfferot do fir aktiv ze ginn esoubal dat neit Gesetz an der Chamber gestëmmt ass.
Mär bleiwen um Ball.